Umunyamakuru w’Inararibonye Colette Yashyize Hanze Ibyo Avuga ku Mikorere ya FDLR n’Imikoranire Yayo na FARDC
MINEMBWE CAPITAL NEWS (MCN)
Umunyamakuru w’inararibonye akaba n’umusesenguzi mpuzamahanga, Colette Braeckman, umaze imyaka myinshi akurikirana ibibazo by’umutekano na politiki mu karere k’Ibiyaga Bigari, yongeye gushyira ahagaragara ibyo afata nk’ukuri kudakwiye kwirengagizwa ku mikorere y’umutwe wa FDLR ndetse n’imikoranire yawo n’ubutegetsi bwa Repubulika Iharanira Demokarasi ya Congo (RDC).
Mu kiganiro yagiranye na CPL TV, Colette Braeckman yavuze ko impungenge u Rwanda rugaragaza ku mutekano warwo zifite ishingiro. Yashimangiye ko FDLR itakiri umutwe ugizwe gusa n’abasaza bagize uruhare muri Jenoside yakorewe Abatutsi mu 1994, ahubwo ko yakomeje kwiyubaka binyuze mu kwinjiza urubyiruko rushya rwatojwe ibikorwa bya gisirikare.
Uyu munyamakuru, ufite imyaka 80 y’amavuko kandi uzwi cyane kubera ubunararibonye bwe mu gukurikirana ibibazo byo mu karere k’Ibiyaga Bigari, yasobanuye ko yiboneye n’amaso ye uko FDLR yubatse umutwe mushya w’abarwanyi bafite imyitozo ihambaye, bazwi ku izina rya CRAP (Commandos de Recherche et d’Action en Profondeur).
Yagize ati:
“Abantu bavuga ko abagize FDLR bashaje, ariko bibagirwa ko babyaye abana. Nahuye na bo, nibonera urubyiruko rwatojwe gisirikare, rufite imyaka hafi 20, kandi rufite imyitozo ihambaye.”
Braeckman yavuze ko abo barwanyi batozwa bafite intego yo kuzatera u Rwanda no guhirika ubutegetsi bwa Perezida Paul Kagame, bagamije gusubizaho ubutegetsi bwahozeho mbere ya Jenoside yakorewe Abatutsi.
Yashimangiye ko ibyo atari amakuru yumvise gusa, ahubwo ko yabibonye ubwo yakoraga ubushakashatsi mu burasirazuba bwa RDC, aho yahuye n’abagize uwo mutwe ndetse akaganira na bamwe muri bo.
Mu bice byakuruye impaka muri icyo kiganiro, Colette Braeckman yanenze bikomeye ubutegetsi bwa Perezida Félix Tshisekedi, avuga ko gukorana n’umutwe wa FDLR ari ikosa rikomeye rifite ingaruka ku mutekano w’akarere.
Yavuze ko bamwe mu bakorana bya hafi n’ubutegetsi bwa Kinshasa bafite imikoranire n’abagize FDLR, ibintu avuga ko bituma ingengabitekerezo y’urwango n’iya Jenoside ikomeza kubona aho ikwirakwira.
Yagize ati:
“Iyo abantu bakorana bya hafi n’ubutegetsi bwa Tshisekedi bafite ingengabitekerezo nk’iyatumye Jenoside iba, ntushobora gutekereza ko u Rwanda rutabizi cyangwa ngo rwirengagize ibyo bibazo.”
Yakomeje asobanura ko ibyo ari imwe mu mpamvu zifatika zituma u Rwanda rukomeza gushimangira ingamba zarwo zo kurinda umutekano ku mupaka uhuza ibihugu byombi.
Uyu munyamakuru yanagarutse ku masezerano y’amahoro u Rwanda na RDC byashyizeho umukono i Washington tariki ya 27 Kamena 2025, yari agamije gusenya umutwe wa FDLR no kugabanya umwuka mubi hagati y’ibihugu byombi.
Braeckman yavuze ko, n’ubwo ayo masezerano yari ategerejweho gutanga icyizere gishya, kugeza ubu hakigaragara icyuho gikomeye mu kuyashyira mu bikorwa, cyane cyane ku ngingo yo kurandura FDLR.
Yibukije ko, n’ubwo ubutegetsi bwa Kinshasa bwakunze kuvuga ko abarwanyi ba FDLR baba mu bice bigenzurwa na AFC/M23, Leta Zunze Ubumwe za Amerika zagaragaje ko ubutegetsi bwa RDC nabwo bugomba kubanza gusenya imitwe ya FDLR iri mu duce bugenzura.
Braeckman yavuze ko ikibazo gikomeye kurushaho ari uko bamwe mu bagize FDLR bakomeje kugira ijambo mu nzego zitandukanye muri RDC, ibintu avuga ko bishobora gukomeza guteza umutekano muke mu karere.
Yashimangiye ko amahoro arambye hagati y’u Rwanda na RDC atazagerwaho igihe cyose ikibazo cya FDLR kitarakemurwa mu buryo bugaragara kandi bufatika.
Yasoje asaba impande zombi kubahiriza amasezerano ya Washington mu kuri no mu bikorwa, avuga ko ubushake bwa politiki ari bwo bwonyine bushobora gutuma ayo masezerano atanga umusaruro.
Ibi bitekerezo bya Colette Braeckman bikomeje kuvugisha benshi, cyane cyane mu gihe ikibazo cya FDLR, umubano w’u Rwanda na RDC, n’umutekano wo mu karere k’Ibiyaga Bigari bikomeje kuba mu ngingo ziganirwaho cyane ku rwego mpuzamahanga.
