Amasasu Yumvikanye Hafi y’Ingoro ya Perezida Tshisekedi i Kinshasa: Icyabaye Cyose Cyamenyekanye, Hamenyekanye n’Impamvu Yatumye Araswa
MINEMBWE CAPITAL NEWS (MCN)
Mu ijoro ryo ku wa Mbere rishyira ku wa Kabiri, amasasu menshi yumvikanye mu bice biherereye hafi ya Cité de l’OUA, aho Perezida wa Repubulika Iharanira Demokarasi ya Congo, Félix-Antoine Tshisekedi Tshilombo, atuye. Ibi byateye impungenge abaturage benshi, mu gihe ku mbuga nkoranyambaga hakwirakwizwaga amakuru n’ibihuha byavugaga ko haba habaye igitero cyagabwe ku ngoro y’Umukuru w’Igihugu.
Nyamara, amakuru yizewe yatangajwe n’Ikigo cy’Igihugu cy’Amakuru muri RDC (ACP) agaragaza ko ayo masasu nta sano yari afitanye n’igitero cyagabwe kuri Cité de l’OUA cyangwa ku mutekano wa Perezida Félix Tshisekedi.
Amakuru yatanzwe n’abatangabuhamya avuga ko kurasana kwabereye mu gace kegereye Parquet Militaire ya Ngaliema, iherereye mu majyaruguru y’uburengerazuba bw’Umujyi wa Kinshasa. Aho ni ho bivugwa ko habereye igerageza ryo gutoroka ry’imfungwa zari zifungiye muri kasho y’iyo Parquet ya gisirikare.
Nk’uko umwe mu bakorera hafi y’Ingoro y’Umukuru w’Igihugu yabitangarije ACP, yavuze ko umutekano muri Cité de l’OUA wari usanzwe kandi ko ayo masasu atarashwe agamije icyo gice.
Yagize ati: “Aya masasu ntiyarashwe yerekeza kuri Cité de l’OUA. Hano ibintu byose byari bituje. Amakuru twahawe ni uko hari imfungwa zimwe zagerageje gutoroka, zimwe zikabasha guhunga zikihisha mu bice bikikije aho, mu gihe umwe muri zo yakomerekejwe ku kuboko.”
Nyuma y’igerageza ryo gutoroka, inzego z’umutekano n’iz’igisirikare zahise zitabara, zitangiza ibikorwa byo gushakisha abatorotse no kongera gukaza umutekano muri ako gace. Hafashwe ingamba zikomeye zirimo kohereza abasirikare n’abapolisi benshi kugira ngo barinde abaturage ndetse banashakishe abakekwaho gutoroka.
Amakuru ari guhuriza ku kuba ibyabaye bifitanye isano n’iryo gerageza ryo gutoroka ry’imfungwa zari zifungiye muri Parquet Militaire ya Ngaliema, aho kuba igitero cyari kigamije Perezida wa Repubulika cyangwa ingoro ye.
N’ubwo bimeze bityo, kuba amasasu yarumvikanye hafi y’ahantu harinzwe cyane mu gihugu byatumye abaturage bagira impungenge, cyane cyane ku bijyanye n’umutekano w’ibigo bikomeye bya Leta.
Kugeza ubu, ubuyobozi bwa RDC ntiburatangaza umubare nyawo w’imfungwa zagerageje gutoroka cyangwa izabashije guhunga. Nta bisobanuro buratanga kandi ku bijyanye n’uko hari abandi bakomerekeye muri icyo gikorwa cyangwa niba hari abamaze kongera gufatwa.
Biteganyijwe ko inzego zibishinzwe zizatanga ibisobanuro birambuye mu masaha ari imbere, birimo umubare w’abari bagize uruhare muri iryo gerageza ryo gutoroka, aho ibikorwa byo kubashakisha bigeze, ndetse n’impamvu nyakuri yatumye bashaka guhunga.
MINEMBWE CAPITAL NEWS izakomeza gukurikirana iyi nkuru no kubagezaho amakuru yizewe uko azagenda amenyekana.
